Die Weihnachtsgeschiche auf Barmer Platt Datt Kend kommt op de Welt
Wuppertal · Die Weihnachtsgeschichte auf Barmer Platt – dieses Kleinod hat Paul Gerhard Sassenhausen 1977 geschaffen. Zur Erinnerung an den Autor stimmt die Rundschau Wuppertal mit seiner Version der berühmten Zeilen aus dem Lukas-Evangelium auf die Festtage ein.
Domols, en dän Dagen, passierten et, datt dä Kaiser Augustus et genau weten wohl. Hä gow dän Befehl ut, datt alle Aädbewohner getold weren meuten.
Datt wor die ierschte Volkstählong, on die geng vanstatten, als dä Quirinius en Syrien dä Matador wor. Do makten se sek all op de Socken, öm sek enschriewen tu loten, jeder geng en sin Nest.
Og Joseph makten sek op de Lappen, van dä Stadt Nazareth en Galiläa ut trock hä rop no Judäa en die Stadt vam David, die het Bethlehem, weil hä ut däm Huus on van dä Famillie David herkom, öm sek met Maria, sinnem aangetrauten Weit, registrieren tu loten – bie dä wor watt ongerwegs.
Nu‘ passierten et, als se do woren, datt dä Steekdag kom on se datt Kend kregen sollten. On sie breit ehren ierschten Jong op de Welt, schlött än en Kengerdöker on let än en nen Fretdrog, denn sie woßten nich wohen domet, weil alle Hotels proppen voll woren.
Nu‘ woren en dä Gegend Hirten op em Feld, die blewen et Neits druten, öm op ehre Dierschs optupassen. Tu denen kom en Engel vam Herrn. Do stongen se schmackdig medden em göttlichen Rampenlecht on schlotter‘en vör Angst.
Awwer dä Engel kallten se aan on seit: „Nur kinne Angst! Denn ek breng önk ene godde Neuigket, die allem Volk tur grooten Freud‘weren werd; vandag, en dä Stadt vam David, es önk en Retter geboren, datt es Christus, dä Herr. On datt es önker Merkmol: Jött werend en Baby fengen, en Kengerdöker geschlonn, datt schlöppt en nem Fretdrog.“
On plötzlich kreg dä Engel Verstärkong van dä hemmlischen Armée, die presen Gott on sproken: „Ehr‘ sie Gott em höchsten Hemmel on op de Ääd dän Menschen Freden, die hä leew hätt.“
Als die Engel sek van ehnen op dän Rödrwech en dän Hemmel gemakt hatten, do stoppten die Hirten de Köppe tusamen, on dä ene seit tum angern: „Nu‘ lotend us no Bethlehem gon on äs nokieken, watt do passiert es on watt us dä Herr hätt weten loten.“
On sie nohmen de Been en de Häng, datt se henkomen, on fongen Maria on Joseph met däm Kend, datt log em Fretdrog. Als se et gese‘n hatten, do vertollten se, wam ehnen van däm Kleenen geseit wor.
Alle, die ehnen tuhörten, komen ut em Stunen nich mehr rut, bie däm, watt die Hirten tu vertällen hatten. Maria merkten sek die Wörd god on let se sek emmer wier dörch Kopp on Herz gon.
Dann gengen die Hirten wier tureu, presen on lowden Gott för all datt, watt se gese‘n on gehört hatten on watt met däm öwereenstemmten, watt ehnen aangeseit wor.
